Szychta na grubie we Graubergu.
- Sztajger! Hajer na przodku pedzioł, że kadzi tam choby ze chlywika.
- Pierona, pudzcie nazod. Dejcie pozór na karbidki, coby zaś nie dupło.
- Zrobiymy się krótko pauza, niech chopcy co wyłonaczom, jak tam wyluftować.
- Sztajger, dejcie pokój! Jako pauza, przeca za pół godziny momy fajrant.
- Tyż prowda. Chopcy, idymy do dom. Ino bajzlu mi tam nie łostowcie, coby te boroki z drugiej szychty zaś nie buczeli.
- Ja, bydzie na zicher zrobione, tak, jak trza.
Potym było słychać ino człapanie cwergowych kromfleków o zol a mlaskanie, bo po drodze sie klapsznity jedli. Łoroz jedyn się odezwol:
- Sztajger, a je to richtig prowda, co fater nom w doma pedzieli? Że Cysorz wojoków zbiero, coby ich do Tileji posłać? Ponoć bydom szli bez naszo dolina?
- Ja, richtig. Tak pedzieli naszymu faktorowi we Nuln, a on to bez kuriera posłoł do wodza. Idom do Tileji, bo tam coś słyszeli, że jakoś sie tam srogo chaja kroi, z tym pierońskim graślawcem Glaxo Slimsonem, niech go pieron szczeli.
- To może trocha karlifranców nom do bojtlików wleci? Przeca prziydo sie im, znaczy cysorzowym, i szpyrka, i wurszt,wyndzony, i kapusta, i piwo, i gorzołka, i cwista, coby sie bez góry przedostać. A i szypy i wogóle cołko broń mogymy im przedać, pra? No bo kaj to dostanom po drodze, jak nie u nos?
- Twoja matka Erwin, to sie chyba za młodu na jakiegoś gnoma za bardzo spozierala takiś chytry, ale gowa mosz richtig nie od parady. Też my to w radzie pedzieli kunigowi.
- A i to wom powim, karlusy moje, że kunig pozwolił coby ochotniki z wojskiem kajzera cuzamen poszli, coby z tymi pierońskimi goblinami fertich był, abo jeich ze gór wyciepnąć. Ino trocha nas to martwi, co to cysorskie wojsko ponoć zbierano sie na granicy Stirlandu i Zgromadzenio...
- Nie godejcie. przeca niziołków by do wojska nie wzienli...
- A czort ich wie tych goroli, co oni tam wydumajom. Jo wom ino powiem, cobyście szykowali se zbroice i brusili żelaziwo, naszykujciese porządne sztyle do pyrlików.
